Safnkostur Héraðsbókasafnsins:
Aðstaða bókasafnsins
Héraðsbókasafnið er staðsett í eigin húsnæði í
Grunnskólanum á Hólmavík. Þröngt er um safnið og mikið af bókum og
blöðum er í geymslum, bæði í Félagsheimili Hólmavíkur, uppi á lofti yfir smíðastofunni í skólanum
og í geymslu í kjallaranum á skólanum.
Bækur og blöð
Fjölmörg eintök af bókum eru aðgengileg á bókasafninu, um
það bil 13 þúsund bindi. Skáldsögur og ævisögur eru einna mest
áberandi, ásamt barnabókum. Bókasafnið er áskriftandi að kiljum
Ás-útgáfunnar og Kiljuklúbbnum og
kaupir einnig nokkur tímarit, s.s. Lifandi vísindi og Mannlíf. Allmikið
er til af eldri tímaritum. Hægt er að fá tímaritin lánuð, rétt eins og
bækurnar.
Á hverju ári eru keyptar töluvert margar nýjar bækur. Einnig er
tekið fegins hendi á móti bókagjöfum, bæði gömlum bókum og nýjum. Ef mörg eintök
eru til af sömu bók eru aukaeintökin stundum boðin til sölu á bókasafninu eða
hjá Strandakúnst yfir sumartímann. Verð á slíkum bókum er á bilinu
100-500 krónur.
Barnabækur
Nærri því allar nýjar barna- og unglingabækur sem koma út
á íslensku eru keyptar inn á bókasafnið. Sá hluti safnsins er því býsna
góður. Barnabækur eru lánaðar mikið út, bæði til nemenda Grunnskólans
og barna þeirra sem eru félagar í bókasafninu.
Skólabækur og þjónusta við námsmenn
Héraðsbókasafnið er jafnframt hefðbundnu starfi skólabókasafn fyrir
Grunnskólann
á Hólmavík og hluti af námsbókum er skráð í kerfi
bókasafnsins.
Á síðustu árum hefur fjarnám einnig aukist mjög hjá
Strandamönnum eins og öðrum íbúum dreifbýlisins. Til að létta fjarnemum
námið hefur Héraðsbókasafnið með mestu
ánægju milligöngu um lán á bókum frá öðrum bókasöfnum ef eftir því
er leitað. Þessi millisafnalán hafa aukist verulega á síðustu misserum.
Eins er sjálfsagt að útvega bækur í millisafnaláni þó ekki sé ætlunin
að nota þær við nám.
Hljóðbækur, vídeóspólur og DVD
Héraðsbókasafnið á nokkrar hljóðbækur og hyggst efla þann þátt
starfseminnar á næstu misserum. Hið sama á við um vídeóspólur, en
bókasafnið eignaðst nýlega allmargar barnaspólur og á fyrir nokkuð af
heimildamyndum og þess háttar efni. Ætlunin er að styrkja þennan safnkost
nokkuð á næstunni. Vídeóspólur er hægt að fá að láni í viku í senn.
Borðspil
Héraðsbókasafnið á nokkur borðspil sem nú eru til útláns. Notendur bókasafnsins
geta fengið
borðspil að láni í viku í senn. Vegna þessarar nýbreytni
óskar bókasafnið eftir gömlum
borðspilum ef einhver á slík ónotuð uppi í skáp. Ekkert gerir til þó eitthvað vanti í,
hugsanlega er hægt að sameina tvö samskonar spil í eitt heilt.
Hefur þú fleiri góðar hugmyndir?
Við höfum gaman af góðum hugmyndum. Sumar þeirra komast í framkvæmd,
aðrar ekki. Ef þú hefur góða hugmynd fyrir bókasafnið, endilega láttu okkur þá vita
í netfangið bokasafn@holmavik.is
|
